Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

քրեական գործ թիվ ԵԴ/1195/01/19

Երևան քաղաքի առաջին ատյանի ընդհանուր իրավասության դատարանը,

նախագահությամբ` դատավոր Մ. Մարտիրոսյանի,
քարտուղարությամբ` Թ. Խաչատրյանի,
Ա. Հովհաննիսյանի,
մասնակցությամբ`

մեղադրողներ
Հայաստանի Հանրապետության
/այսուհետ նաև ՀՀ/ գլխավոր դատախազության
ՀՀ ազգային անվտանգության ծառայության
մինչդատական վարույթի օրինականության
նկատմամբ հսկողության վարչության
դատախազ Մ. Անտոնյանի,


պաշտպան Հ. Սարգսյանի,

թարգմանիչներ Հ. Զաքարյանի,
Յու. Զեյնալյանի

2021թ. մայիսի 12-ին Երևանում,

դռնբաց դատական նիստում, քննեց քրեական գործն ըստ մեղադրանքի

Կառլեն Դանիելի Շուբարալյանի
ծնված 1978թ. հունիսի 5-ին Երևան քաղաքում
/հայ, ՀՀ քաղաքացի, միջնակարգ կրթությամբ, ամուսնացած, խնամքին մինչև տասնչորս տարեկան երկու անչափահաս երեխա, չի աշխատում, նախկինում չդատված, վարձակալական հիմունքներով բնակվել է Երևան քաղաքի Փ. Բուզանդ փողոցի թիվ 45 շենքի թիվ 18 բնակարանում, անազատության մեջ է 2019թ. հուլիսի 8-ից/
մեղադրվում է ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով, 34-266-րդ հոդվածի 3-րդ մասի 2-րդ կետով,
1. Գործի դատավարական նախապատմությունը.
1.1. ՀՀ պետական սահմանով, 2019թ. հուլիսի 1-ին, մի խումբ անձանց կողմից նախնական համաձայնությամբ, առանձնապես խոշոր չափերով թմրամիջոցների մաքսանենգություն կազմակերպելու, դրանք իրացման նպատակով ապօրինի ձեռք բերելու փորձի դեպքով, ՀՀ ազգային անվտանգության ծառայության /այսուհետ՝ ԱԱԾ/ քննչական դեպարտամենտում, 2019թ. հուլիսի 6-ին, ՀՀ քրեական օրենսգրքի 38-267.1 հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով հարուցվել է թիվ 58217119 քրեական գործը, որի նախաքննության կատարումը հանձնարարվել է քննչական խմբին:
1.2. 2019թ. հուլիսի 8-ին Կառլեն Շուբարալյանը, Համազասպ Վրեժի Բաղդասարյանը, Մանե Միքայելի Սահակյանը, Հրաչիկ Գագիկի Նազարյանը, իրացնելու նպատակով առանձնապես խոշոր չափերով թմրամիջոցներ ապօրինի ձեռք բերելու, պահելու, փոխադրելու, առաքելու կամ դրանք ապօրինի իրացնելու կասկածանքով բերման են ենթարկվել ՀՀ ԱԱԾ: Նույն օրը Կ. Շուբարալանը ձերբակալվել է:
1.3. Նախաքննության մարմնի 2019թ. հուլիսի 10-ի որոշմամբ Կառլեն Դանիելի Շուբարալյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով նախատեսված հանրորեն վտանգավոր հետևյալ արարքների կատարման համար. §որ նա կազմակերպել է առանձնապես խոշոր չափերով թմրամիջոցի մաքսանենգություն, ինչպես նաև փորձել է իրացման նպատակով ապօրինի ձեռք բերել առանձնապես խոշոր չափերով նշված թմրամիջոցը:
Այսպես.
Կառլեն Շուբարալյանը իրացման նպատակով թմրամիջոց ապօրինի ձեռք բերելու շուրջ նախնական համաձայնության է եկել Ամերիկայի Միացյալ Նահանգներում գտնվող, ինքնությունը չպարզված անձի հետ: Այնուհետև, թմրամիջոցը ձեռք բերելու նպատակով Կառլեն Շուբարալյանն ինքնությունը չպարզված նշված անձին ուղարկել է իր ծանոթ Մանե Սահակյանի վերաբերյալ տվյալները (անուն, ազգանուն, աշխատանքի վայրի հասցե), որպեսզի այդ անձն ուղարկված տվյալներով փոստային առաքանով ՀՀ ուղարկի ձեռք բերվելիք թմրամիջոցը:
Պայմանավորվածության համաձայն՝ ինքնությունը չպարզված անձը ԱՄՆ-ից Մանե Սահակյանի անվամբ փոստային առաքանիով, խաղալիքների մեջ թաքցված վիճակում մաքսանենգությամբ` մաքսային հսկողությունից թաքցնելով ՀՀ է ուղարկել առանձնապես խոշոր չափերի` 58.9 գրամ «ՄԴՄԱ» տեսակի թմրամիջոց պարունակող 148 դեղահաբ, որոնք ՀՀ-ում ստացվել է 2019 թվականի հուլիսի 1-ին, ինչի արդյունքում Կառլեն Շուբարալյանը կազմակերպել է առանձնապես խոշոր չափերի նշված թմրամիջոցի մաքսանենգությունը ՀՀ պետական և Եվրասիական տնտեսական միության մաքսային սահմանով:
Այնուհետև, ՀՀ ԱԱԾ աշխատակիցների կողմից 2019 թվականի հուլիսի 6-ին իրականացվել են «նամակագրության, փոստային հեռագրական և այլ հաղորդումների վերահսկում» օպերատիվ-հետախուզական միջոցառում, որի ընթացքում թմրամիջոց պարունակող նշված դեղահաբերն առգրավվել են և փոխարինվել այլ առարկաներով, որից հետո 2019 թվականի հուլիսի 8-ին իրականացված « վերահսկելի մատակարարում և գնում» օպերատիվ-հետախուզական միջոցառման շրջանակներում առաքանին հանձնվել է այն ստանալու համար ներկայացած անզգուշությամբ գործող Մանե Սահակյանին, ով առաքանին փոխանցել է իր հետ փոստային բաժանմունք այցելած Կառլեն Շուբարալյանին, որից հետո վերջինը բռնվել և բերման է ենթարկվել ՀՀ ԱԱԾ աշխատակիցների կողմից, իսկ առաքանին առգրավվել է Կառլեն Շուբարալյանի կողմից շահագործվող «ԲՄՎ» մակնիշի 97 RZ 999 համարանիշով ավտոմեքենայի խուզարկությամբ:
Արդյունքում Կառլեն Շուբարալյանը չի կարողացել իրացման նպատակով նշված թմրամիջոցը ձեռք բերել իր կամքից անկախ հանգամանքներով:
Այսպիսով, Կառլեն Շուբարալյանին մեղսագրվում են հանցավոր արարքներ, որոնք նախատեսված են ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով: ¦:
1.4. Դատարանի 2019թ. հուլիսի 11-ի որոշմամբ Կառլեն Շուբարալյանի նկատմամբ որպես խափանման միջոց է կիրառվել կալանավորումը:
1.5. Նախաքննության մարմնի 2019թ. հոկտեմբերի 28-ի որոշմամբ Կառլեն Շուբարալյանին առաջադրված մեղադրանքը փոփոխվել է և նրան մեղադրանք է առաջադրվել ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով նախատեսված հանրորեն վտանգավոր հետևյալ արարքների կատարման համար. §որ նա կազմակերպել է առանձնապես խոշոր չափերով թմրամիջոցի մաքսանենգություն, ինչպես նաև փորձել է իրացման նպատակով ապօրինի ձեռք բերել առանձնապես խոշոր չափերով նշված թմրամիջոցը:
Այսպես.
Կառլեն Շուբարալյանը իրացման նպատակով թմրամիջոց ապօրինի ձեռք բերելու շուրջ նախնական համաձայնության է եկել Ամերիկայի Միացյալ Նահանգներում գտնվող, ինքնությունը չպարզված անձի հետ: Այնուհետև, թմրամիջոցը ձեռք բերելու նպատակով Կառլեն Շուբարալյանն առանց իր ծանոթ Մանե Սահակյանին տեղեկացնելու և առանց նրա համաձայնության ինքնությունը չպարզված նշված անձին տրամադրել է Մանե Սահակյանի վերաբերյալ տվյալները (անուն, ազգանուն, աշխատանքի վայրի հասցե), որպեսզի այդ անձն ուղարկված տվյալներով փոստային առաքանով ՀՀ ուղարկի պայմանավորվածության առարկա թմրամիջոցը:
Պայմանավորվածության համաձայն՝ ինքնությունը չպարզված անձը ԱՄՆ-ից՝ «Ջարեդ Անդերսոն» (Jared Anderson) տվյալներով անձի անունից Լաս Վեգաս, Մոյավե 4367 Ռդ (5 Mojave Rd #4367 Las Vegas) հասցեից Մանե Սահակյանի անվամբ, ք. Երևան, Սարյան փողոց, 26/4 հասցեով ուղարկել է փոստային առաքանի, որում խաղալիքների մեջ թաքցված վիճակում մաքսանենգությամբ՝ մաքսային հսկողությունից թաքցնելով, իրացման նպատակով ՀՀ է առաքել առանձնապես խոշոր չափերով՝ 58.9 գրամ «ՄԴՄԱ» տեսակի թմրամիջոց պարունակող 148 հաբ, որոնք 2019 թվականի հուլիսի 1-ին ստացվել են ՀՀ-ում, ինչի արդյունքում Կառլեն Շուբարալյանը կազմակերպել է առանձնապես խոշոր չափերով նշված թմրամիջոցի մաքսանենգությունը ՀՀ պետական և Եվրասիական տնտեսական միության մաքսային սահմանով:
Այնուհետև, ՀՀ ԱԱԾ աշխատակիցների կողմից իրականացվել են «նամակագրության, փոստային հեռագրական և այլ հաղորդումների վերահսկում» (04.07.2019թ.) և «վերահսկելի մատակարարում և գնում» (06.07.2019թ.) օպերատիվ-հետախուզական միջոցառումներ, որոնց ընթացքում թմրամիջոց պարունակող նշված հաբերը փոխարինվել են թմրամիջոց չպարունակող դրանց նմանվող հաբերով, որից հետո 2019 թվականի հուլիսի 8-ին Կառլեն Շուբարալյանը Մանե Սահակյանի հետ ներկայացել է Երևան քաղաքի Սարյան փողոցի 22-րդ հասցեում գործող «Հայփոստ» ՓԲԸ թիվ 0002 բաժանմունք և ստացել փոստային առաքանին, որից հետո Կառլեն Շուբարալյանը բռնվել և բերման է ենթարկվել ՀՀ ԱԱԾ աշխատակիցների կողմից, իսկ առաքանին առգրավվել է Կառլեն Շուբարալյանի կողմից շահագործվող «ԲՄՎ» մակնիշի 97RZ999 համարանիշով ավտոմեքենայի խուզարկությամբ:
Արդյունքում Կառլեն Շուբարալյանն իրացման նպատակով առանձնապես խոշոր չափերով նշված թմրամիջոցը ձեռք բերելն ավարտին չի հասցրել իր կամքից անկախ հանգամանքներով:
Այսպիսով, Կառլեն Շուբարալյանին մեղսագրվում են հանցավոր արարքներ, որոնք նախատեսված են ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով:¦:
1.6. Նախաքննության մարմնի 2019թ. դեկտեմբերի 18-ի որոշմամբ թիվ 58217119 քրեական գործից անջատվել է թիվ 58235719 քրեական գործն ըստ մեղադրանքի Կառլեն Շուբարալյանի՝ ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով, որը 2019թ. դեկտեմբերի 24-ին հաստատված մեղադրական եզրակացությամբ ուղարկվել և 2019թ. դեկտեմբերի 27-ին ստացվել է Դատարան, նույն օրն ընդունվել է Դատարանի վարույթ, իսկ 2020թ. հունվարի 8-ին որոշում է կայացվել քրեական գործի դատական քննությունը 2020թ. հունվարի 15-ին նշանակելու մասին։
2. Դատարանի կողմից հաստատված փաստական հանգամանքները.
2.1. Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Կառլեն Շուբարալյանը կազմակերպել է առանձնապես խոշոր չափերով թմրամիջոցի մաքսանենգություն, ինչպես նաև 2019թ. հուլիսին, Երևանում, փորձել է իրացման նպատակով ապօրինի ձեռք բերել առանձնապես խոշոր չափերով թմրամիջոց հետևյալ հանգամանքներում.
Ամերիկայի Միացյալ Նահանգներում բնակվող, ՀՀ քաղաքացի Կառլեն Դանիելի Շուբարալյանը 2019թ. մարտի 6-ին ստանալով մինչև 2019թ. ապրիլի 6-ը ուժի մեջ ՀՀ վերադարձի վկայական՝ վերադարձել է Հայաստան: Նա իրացման նպատակով թմրամիջոց ապօրինի ձեռք բերելու շուրջ նախնական համաձայնության է եկել Ամերիկայի Միացյալ Նահանգներում գտնվող, ինքնությունը չպարզված անձի հետ: Այնուհետև, թմրամիջոցը ձեռք բերելու նպատակով Կառլեն Շուբարալյանն առանց իր ծանոթ Մանե Սահակյանին տեղեկացնելու և առանց նրա համաձայնության, ինքնությունը չպարզված նշված անձին տրամադրել է Մանե Սահակյանի վերաբերյալ տվյալները՝ անուն, ազգանուն, աշխատանքի վայրի հասցե, որպեսզի այդ անձն ուղարկված տվյալներով, փոստային առաքանով ՀՀ ուղարկի պայմանավորվածության առարկա թմրամիջոցը:
Պայմանավորվածության համաձայն՝ ինքնությունը չպարզված անձը ԱՄՆ-ից՝ «Ջարեդ Անդերսոն» (Jared Anderson) տվյալներով անձի անունից Լաս Վեգաս, Մոյավե 4367 Ռդ (5 Mojave Rd #4367 Las Vegas) հասցեից Մանե Սահակյանի անվամբ, ք. Երևան, Սարյան փողոց, 26/4 հասցեով ուղարկել է փոստային առաքանի, որում խաղալիքների մեջ թաքցված վիճակում, մաքսանենգությամբ՝ մաքսային հսկողությունից թաքցնելով, իրացման նպատակով ՀՀ է առաքել առանձնապես խոշոր չափերով՝ 58.9 գրամ «ՄԴՄԱ» տեսակի թմրամիջոց պարունակող 148 հաբ, որոնք 2019 թվականի հուլիսի 1-ին ստացվել են ՀՀ-ում, ինչի արդյունքում Կառլեն Շուբարալյանը կազմակերպել է առանձնապես խոշոր չափերով նշված թմրամիջոցի մաքսանենգություն ՀՀ պետական և Եվրասիական տնտեսական միության մաքսային սահմանով:
Այնուհետև, ՀՀ ԱԱԾ աշխատակիցների կողմից իրականացվել են «նամակագրության, փոստային հեռագրական և այլ հաղորդումների վերահսկում» (04.07.2019թ.) և «վերահսկելի մատակարարում և գնում» (06.07.2019թ.) օպերատիվ-հետախուզական միջոցառումները, որոնց ընթացքում թմրամիջոց պարունակող նշված հաբերը փոխարինվել են թմրամիջոց չպարունակող, դրանց նմանվող հաբերով:
2019 թվականի հուլիսի 8-ին Կառլեն Շուբարալյանը Մանե Սահակյանի հետ ներկայացել է Երևան քաղաքի Սարյան փողոցի 22-րդ հասցեում գործող «Հայփոստ» ՓԲԸ թիվ 0002 բաժանմունք և ստացել փոստային առաքանին, որից հետո Կառլեն Շուբարալյանը բռնվել և բերման է ենթարկվել ՀՀ ԱԱԾ աշխատակիցների կողմից, իսկ առաքանին առգրավվել է Կառլեն Շուբարալյանի կողմից շահագործվող «ԲՄՎ» մակնիշի 97RZ999 համարանիշով ավտոմեքենայի խուզարկությամբ:
Արդյունքում՝ Կառլեն Շուբարալյանն իրացման նպատակով առանձնապես խոշոր չափերով նշված թմրամիջոցը ձեռք բերելն ավարտին չի հասցրել՝ իր կամքից անկախ պատճառներով:
3. Ապացույցների հետազոտում և գնահատում
3.1. Դատարանի կողմից հաստատված հանգամանքները հիմնավորվում են հետևյալ ապացույցներով.
3.2. Վկա Սոկրատ Հարությունյանի ցուցմունքով այն մասին, որ իր ծանոթներից տեղեկացել է, որ ԱՄՆ-ից գործարար է եկել Հայաստան, ով ցանկանում է ներդրումներ անել ու նրան աշխատանքի բերումով ժամանակ առ ժամանակ վարորդ է անհրաժեշտ, ինչի համար վարձատրելու է 150.000-200.000 ՀՀ դրամ աշխատավարձ: Իմացել է, որ նշված մարդու անունը Կառլեն է: Վերցրել է նրա հեռախոսահամարը և դեպքից մոտ 10 օր առաջ զանգել նրան՝ աշխատանքի համար 14-20-20 հեռախոսահամարին: Այնուհետև գնացել հանդիպել է նրան, քննարկել են աշխատանքի պայմանները: Պայմանավորվածության համաձայն ավտոմեքենան նա պետք է տար: Ինքը համաձայնվել է Կառլեն Շուբարալյանի առաջարկին՝ աշխատելու որպես «կանչով-վարորդ»: Այդ օրը Կառլեն Շուբարալյանն իրեն տվել է «BMW» մոդելի 428i տեսակի 97 RZ 999 համարանիշի ավտոմեքենան:
2019 թվականի հուլիսի 8-ին, ժամը 12:00-ին Կառլեն Շուբարալյանն իրեն կանչել է և ինքը գնացել է «Օպերայի» ավտոկայանատեղի, որտեղ ավտոմեքենան թողել էր Կառլենը: Վերցրել է այն, գնացել է Երևան քաղաքի Նար-Դոս փողոցում գտնվող «EMEX» ավտոպահեստամասերի խանութ, որտեղ պատվեր է տվել: Այնուհետև վերադարձել է «Օպերայի» ավտոկայանատեղի, ավտոմեքենան թողել է ավտոլվացման կետում՝ լվանալու համար: Այդտեղից բարձրացել է «Աստրալ» սրճարան, քանի որ Կառլենն այն վարձակալած է եղել և հիմնականում այնտեղ է եղել:
Սրճարանում հանդիպել է Կառլենին, հարցրել է, թե կարող է գնալ, ինչին նա պատասխանել է, որ մի հատ իր կա՝ այն տանի իր տուն, ինչից հետո կարող է գնալ: Այդ ժամանակ նա իրեն տվել է ստվարաթղթե վարդագույն տուփ, որի արտաքին մասից երևացել է, որ դրանում երեխայի համար նախատեսված խաղալիք է եղել: Կառլեն Շուբարալյանն իրեն ասել է, որ այդ խաղալիքը տանի ու թողնի Բյուզանդի փողոցում գտնվող նրա տանը: Վերցրել է նրանից այդ տուփը, գանցել է ավտոլվացման կետ, նստել «BMW» մոդելի 97 RZ 999 համարանիշի ավտոմեքենան և ուղևորվել է դեպի Բյուզանդի փողոց: Հասնելով Բյուզանդի փողոց՝ ավտոմեքենան կանգնեցրել են երկու անձ ու ներկայացել են որպես ՀՀ ազգային անվտանգության ծառայության աշխատակիցներ, ինչից հետո իրեն ավտոմեքենայով բերել են ՀՀ ազգային անվտանգության ծառայության վարչական շենք:
Երբ Կառլենն իրեն տվել է այդ վարդագույն ստվարաթղթե տուփը՝ միայն ասել է, որ դրանում երեխայի խաղալիք է և ուրիշ ոչ մի բան չի ասել դրա պարունակության վերաբերյալ: Ինքն որևէ կերպ չի իմացել, որ դրանում հնարավոր է թմրամիջոց լինի:
Երբ Կառլեն Շուբարալյանն իրեն տվել է այդ տուփը՝ այն եղել է արկղի մեջ: Կառլեն Շուբարալյանն իրեն ասել է, որ այդ տուփը հանի արկղի միջից, իսկ արկղը գցի աղբամանը: Դրանից հետո ինքը «Աստրալ» ակումբից դուրս գալուց հետո՝ Կառլենի ցուցումի համաձայն բացել է արկղը, որի մեջ դրված է եղել իր կողմից նշված վարդագույն տուփը: Այդ արկղը գցել է «Աստրալ» ակումբից քիչ ներքև գտնվող աղբամանում, որից հետո նստելով ավտոմեքենան՝ գնացել է այդտեղից:
/դատական նիստի արձանագրություն, հատոր 1 գ.թ.169-172, հատոր 2 գ.թ. 128-131/

3.3. Վկա Համազասպ Բաղդասարյանի ցուցմունքով այն մասին, որ երկուսից երեք ամիս առաջ իր ընկերոջ միջոցով ծանոթացել է Կառլեն Շուբարալյանի հետ: Տեղյակ է եղել, որ նա երկար ժամանակ բնակվել է ԱՄՆ-ում: 2019թ. հուլիսի 8-ի կեսօրին, Երևան քաղաքի «Աստրալ» սրճարանում հանդիպել է Կառլեն Շուբարալյանին, զրուցել են, որից հետո դուրս է եկել զբոսնելու: 40 րոպե անց վերադարձել է նույն վայր, որտեղ Կառլեն Շուբարալյանն եղել է իր ընկեր Հրաչիկ Նազարյանի և իր վարորդ Սոկրատ Հարությունյանի հետ: Քիչ անց իրենց են մոտեցել ՀՀ ազգային անվտանգության ծառայության աշխատակիցներ և դատարանի որոշման հիման վրա խուզարկության են ենթարկել սրճարանը: Խուզարկության ավարտից հետո իրեն բերման են ենթարկել ՀՀ ազգային անվտանգության ծառայության վարչական շենք: Այնտեղ տեղեկացել է, որ Կառլեն Շուբարալյանն առնչություն ունի թմրամիջոցների ապօրինի շրջանառության հետ, սակայն այդ մասին մանրամասներ իրեն հայտնի չեն:
/դատական նիստի արձանագրություն, հատոր 1 գ.թ.149-151,/

3.4. Վկա Հրաչիկ Նազարյանի ցուցմունքով այն մասին, որ Կառլեն Շուբարալյանին ճանաչում է ԱՄՆ-ում բնակվելու ժամանակվանից՝ 1998-1999 թվականներից: Ինքն այնտեղ բնակվել է շուրջ տասը տարի: Հայաստանում 2019 թվականին պատահաբար հանդիպել է Կառլենին, նրա բռնվելուց շուրջ երկու ամիս առաջ:
Հայաստանում 2019 հուլիսի 2-ին կամ 3-ին ինքը և կինը հիմնադրել են «Վին Լունջ» ՍՊԸ-ն, որի հիմնադիրը եղել է իր կինը, իսկ ինքը հանդիսացել է ՍՊԸ-ի տնօրենը: Նշված ՍՊԸ-ով վարձակալել են Երևան քաղաքի Սայաթ-Նովա փողոցում գտնվող «Աստրալ» ակումբը: 2019 թվականի հուլիսի 8-ին, ժամը 15:00-ից 16:00-ի սահմաններում գնացել է սրճարան, որտեղ տեսել է Կառլենին: Վերջինս ցանկացել է միանալ իր բիզնեսին՝ 50/50 տարբերակով և նշված հարցի շուրջ իրենք քննարկումներ են ունեցել: Կառլենի հետ նաև այլ անձինք են եղել, որոնցից ինքը ճանաչել է միայն Համլետին: Իրենք նստել են նույն սեղանի շուրջ և միասին ճաշել են: Այդ ժամանակ իրենց են մոտեցել ՀՀ ազգային անվտանգության ծառայության աշխատակիցները և սկսել են խուզարկություն իրականացնել: Այդ ժամանակ ինքը տեղեկացել է, որ Կառլեն Շուբարալյանը թմրամիջոցներ է բերել Հայաստան, ինչից զարմացել է, քանի որ նա թմրամիջոց չի օգտագործել:
/դատական նիստի արձանագրություն, հատոր 1 գ.թ.152-155/

3.5. Վկա Մանե Սահակյանի նախաքննական ցուցմունքով այն մասին, որ ճանաչում է Կառլեն Շուբարալյանին, ով օգտագործում է 044-14-20-20 բջջային հեոախոսահամարը: Նրան ճանաչում է 2019թ.-ի ապրիլի կեսերից՝ ընդհանուր ընկերական շրջապատից: Ծանոթությունը վերածվել է շատ մտերիմ հարաբերությունների, մասնավորապես՝ միասին բնակվել են մի հարկի տակ, ծանոթացել է նրա ծնողների, ընտանիքի և բարեկամների հետ:
2019 թվականի հունիսի 7-ից կամ 8-ից սկսած իրենց հարաբերությունները սրվել են և վատացել, քանի որ Կառլեն Շուբարալյանն այլ աղջկա հետ իրեն դավաճանել է: Կառլենը զանգել կամ հաղորդագրություններ է ուղարկել իրեն, որոնք նույնիսկ վիրավորական բնույթի են եղել: Իրենց շփումների ընթացքում Կառլեն Շուբարալյանն իրեն պատմել է, որ 8-ից 10 տարեկանից բնակվել է ԱՄՆ-ում, նույնիսկ այնտեղ դատապարտվել է 5 տարվա ազատազրկման: Իր պատմելով՝ ՀՀ է եկել 2019թ.-ի սկզբներին և ոչնչով չի զբաղվել, ցանկացել է ձեռնարակատիրական գործունեւություն իրականացնել:
Իրենց շփումների ընթացքում, մեկ անգամ, իրենց կռվելու օրերին, Կառլեն Շուբարալյանն իր համար ԱՄՆ-ից պատվիրել է սպորտային կոշիկներ, որը չի ստացել և չի կարող ասել, թե ում անունով է ուղարկել: Դեպքից մոտ 10 օր առաջ Կառլեն Շուբարալյանը զանգել է իրեն, հանդիպել և ասել է, որ իր անունով ու աշխատանքի վայրի հասցեով ԱՄՆ-ից պատվիրել է ինչ-որ առարկա՝ չասելով, թե ինչ: Ինքը չի հարցրել, թե ինչ պատվեր է, քանի որ չի հետաքրքրել և խնդրել է չեղյալ համարել, քանի որ չի ցանկացել նրա հետ կապ ունենալու: Կառլեն Շուբարալյանը պատճառաբանել է, որ անձնագիր չունի և իր անունով պատվեր չի կարող անել: Հաշվի առնելով, որ Կառլեն Շուբարալյանն արդեն պատվերն արել է, ինքն էլ փաստի առաջ է կանգնել, ուստի որոշել է այն գալու դեպքում՝ Կառլենի հետ գնա, որպեսզի նա ստանա պատվերը:
2019թ. հուլիսի 8-ին՝ ժամը 12:00-ից 13:00-ի սահմաններում իր սրահ է եկել «Հայ փոստ» ՓԲԸ-ի աշխատակցուհին և իրեն է հանձնել կտրոն՝ ասելով, որ իր անունով պատվեր է եկել: Դրանից հետո իր 077-20-09-06 բջջային համարից հաղորդագրություն է ուղարկել Կառլեն Շուբարալյանին՝ բովանդակությամբ, որ իր պատվերը կատարվել է, երբ հարմար է՝ կարող է վերցնել: ժամը 15:00-ի սահմաններում Կառլեն Շուբարալյանն եկել է իր սրահի մոտ և միասին,իր ընկերոջ «Մերսեդես» մակնիշի մեքենայով գնացել են Երևան քաղաքի Սարյան փողոցի վրա գտնվող «Հայ փոստ» ՓԲԸ-ի գրասենյակ: Այնտեղ միասին ներս են մտել, ինքը ստացել է պատվերը, որը քառակուսի արկղ է եղել և վերադարձել են իր մեքենան: Այն կայանված է եղել «Հայ փոստ» ՓԲԸ-ի գրասենյակի դիմացի փողոցում: Մեքենայում, վարելու կամ կայանված լինելու ընթացքում, Կառլեն Շուբարալյանը բացել է արկղը, որի մեջ առկա է եղել քառակուսի մեկ այլ արկղ: Դրա մեջ երևացել են ինչ որ թելեր, քառակուսի՝ իր պատկերացմամբ մանկական փոքր առարկաներ, որոնց մեջ եղել են նաև նույնանման, մուգ մարմնագույն առարկաներ: Կառլեն Շուբարալյանը դրանցից մեկի վրա մատը դնելով՝ իրեն հարցրել է, կխմի արդյոք, թե ոչ, իսկ ինքը հակառակվել է՝ ասելով, որ չի ցանկանում, ինչի խմի: Կառլեն Շուբարալյանը փորձել է պնդել՝ ասելով, որ «ք...ի համը չհանի», սակայն ինքը մերժել է: Կառլեն Շուբարալյանն իրեն նույնիսկ ասել է, որ մենակով չի փորձի, իսկ ինքը պատասխանել է, որ գնա և ընկերուհու հետ փորձի: Կառլեն Շուբարալյանին հորդորել է իրենից հեռու մնալ: Դրանից հետո Կառլեն Շուբարալյանին իջեցրել է «Աստրալ» սրճարանի մոտ ու հեռացել է:
Հստակ չի կարող ասել, թե Կառլեն Շուբարալյանը ինչ է առաջարկել, բայց այդ տաբլետկան իր կարծիքով օրենքով արգելված հաբ է եղել:
Առաքանին ստանալու ամբողջ ժամանակահատվածում եղել են երկուսով, Կառլեն Շուբարալյանն իրենից հեռու չի գնացել և հեռախոսազրույցներ չի ունեցել:
Իրեն հայտնի չէ, թե ինչ հաբ է իրեն առաջարկել խմել Կառլեն Շուբարալյանը: Ինքն առողջական խնդիրներ չի ունեցել: Իր կարծիքով Կառլեն Շուբարալյանը տեղյակ է եղել, թե ինչ պարունակություն ունի փոստային առաքանին, քանի որ եթե տեղյակ չլիներ, այդ դեպքում ինչի համար պետք է իրեն առաջարկեր որևէ բան փորձել այդ արկղի միջից:
Իր ցուցմունքները Մանե Սահակյանը պնդել է նաև Կառլեն Շուբարալյանի հետ առերես հարցաքննության ժամանակ:
/դատական նիստի արձանագրություն, հատոր 1 գ.թ. 145-148, 258-262, հատոր 2 գ.թ. 14-18, հատոր 1 գ.թ. 204-208/

3.6. «Նամակագրության, փոստային, հեռագրական և այլ հաղորդումների վերահսկում» օպերատիվ հետախուզական միջոցառում անցկացնելու արդյունքների մասին 2019. հուլիսի 4-ի արձանագրությամբ, որի համաձայն առաքանու արկղի վրա առկա է եղել թերթիկ, որի վրա լատինատառ գրված է եղել փոստային առաքանու համարը` CX447285567US, առաքանին ուղարկող անձի տվյալները` «Anderson Jared, Las Vegas, 4367 5 Mojave Rd», իսկ որպես ստացողի տվյալներ նշված է եղել «Mane Sahakjan Make-up Mane Sahakyan Salon-Studio Martiros Saryan st. 26/4 Yerevan, Armenia, 0010» տեղեկությունը: Փոստային առաքանու պարունակությունը պարզելու նպատակով, գրասենյակային դանակի գործածմամբ, արկղի կողային հատվածն առանց վնասելու բացվել է, որի մեջ առկա է եղել ևս մեկ ստվարաթղթե արկղ: Դրա մեջ եղել է գործարանային պայմաններում տեղադրված մանկական խաղալիքների պարագաներ` տեղադրված պլաստմասե հարմարանքի մեջ, իսկ հակառակ կողմում կպչուն ժապավենով ամրացված են եղել պոլիմերային հերմետիկ փաթեթներ, որոնց մեջ եղել են հաբեր: Նշված փաթեթները բացելուց հետո պարզվել է, որ առկա են ընդհանուր 148 հատ հաբեր, որոնք դրվել են «SATUR» կշեռքի վրա, որի էլեկտրոնային ցուցիչը ցույց է տվել 60 գրամ քաշ: Այնուհետև, նշված հաբերը դրվել են «ZIP» պոլիմերային փաթեթի մեջ, որն էլ տեղադրվել է ծրարի մեջ, փակվել է, կնիքվել` հետագայում դատաքիմիական փորձաքննության ներկայացնելու նպատակով:
/դատական նիստի արձանագրություն, հատոր հ-1 գ.թ 14-15/

3.7. «Վերահսկելի մատակարարում և գնում» օպերատիվ հետախուզական միջոցառում անցկացնելու մասին 2019թ. հուլիսի 6-ի արձանագրությամբ, որի համաձայն 2019թ. հուլիսի 4-ին «նամակագրության, փոստային, հեռագրական և այլ հաղորդումների վերահսկում» օպերատիվ-հետախուզական միջոցառում անցկացնելու արդյունքների մասին արձանագրությամբ վավերացված, ք.Երևան, Սարյան 26/4 հասցեով ուղարկված, Մանե Սահակյանի անվամբ CX447285567US համարի միջազգային փոստային առաքանու միջից հայտնաբերված և փորձագետի թիվ 337Ք-19 եզրակացության համաձայն՝ «ՄԴՄԱ» տեսակի թմրամիջոց հանդիսացող, 58.9 գրամ ընդհանուր քաշով 148 հատ հաբերի փոխարեն, պոլիմերային 3 փաթեթների մեջ տեղադրվել են նշված տեսակի թմրամիջոցի հաբերին չափերով, գույնով և քաշով առավելագույնս համապատասխան, դեղատներում ազատ շրջանառության վաճառքի ենթակա, 148 հատ «VITRUM» անվանումով վիտամին դեղահաբեր: Այնուհետև, «VITRUM» անվանումով ընդհանուր 148 հատ դեղահաբերով փաթեթները, հնարավորինս նույն եղանակով, կպչուն ժապավենով ամրակցվել են առաքանու միջից հայտնաբերված մանկական խաղալիքների պարագաներով պլաստմասե հարմարանքի հակառակ կողմում, որը տեղադրվել է խաղալիքների պարագաների արկղի մեջ, որն էլ տեղադրվել է Մանե Սահակյանի անվամբ CX447285567US համարի միջազգային փոստային նույն առաքանու մեջ` /ստվարաթղթե արկղի/ և փակվել` հետագայում ՀՀ ԱԱԾ աշխատակիցների հսկողության ներքո սահմանված կարգով հասցեատերերին փոխանցելու նպատակով:
/դատական նիստի արձանագրություն, հատոր -1, գ.թ. 32-33/

3.8. «Նամակագրության, փոստային, հեռագրական և այլ հաղորդումների վերահսկում» և «վերահսկելի մատակարարում և գնում» օպերատիվ հետախուզական միջոցառումները անցկացնելու արդյունքների մասին 2019թ. հուլիսի 4-ի և 2019թ. հուլիսի 6-ի արձանագրությաններին կից արձանագրությունների կազմման ընթացքի տեսաձայնագրությունով և դրանց վերաբերյալ լազերային սկավառակների զննության արձանագրությամբ, որոնցով հաստատվել են կազմված արձանագրությունների տվյալները:
/դատական նիստի արձանագրություն, հատոր-1 գ.թ. 34, հատոր-2 գ.թ 240-241/

3.9. Որպես այլ փաստաթուղթ ապացույց ճանաչված, «նամակագրության, փոստային, հեռագրական և այլ հաղորդումների վերահսկում» և «վերահսկելի մատակարարում և գնում» օպերատիվ հետախուզական միջոցառումներն անցկացնելու արդյունքների մասին 2019թ. հուլիսի 4-ի և 2019թ. հուլիսի 6-ի արձանագրությաններին կից՝ արձանագրությունների ընթացքի տեսաձայնագրության լազերային սկավառակներով:
/դատական նիստի արձանագրություն, հատոր-2 գ.թ. 242-243/

3.10.Դատաքիմիական փորձաքննության թիվ 337Ք-19 եզրակացությամբ, որի համաձայն փորձաքննությանը ներկայացված, 148 հատ, 58,9 գրամ ընդհանուր քաշով հաբերը «ՄԴՄԱ» տեսակի թմրամիջոց են:
/դատական նիստի արձանագրություն, հատոր-1 գ.թ. 19-21/

3.11. Երևան քաղաքի Սայաթ-Նովա փողոցի 2/10 հասցեում գործով «Աստրալ» ակումբի խուզարկության արձանագրությամբ, որի համաձայն հայտնաբերվել և առգրավվել է Կառլեն Շուբարալյանի կողմից օգտագործվող 353061100672315 գործարանային համարի «Այֆոն ԻքսՌ» մոդելի բջջային հեռախոսը:
/դատական նիստի արձանագրություն, հատոր-1 գ.թ. 102-103/

3.12. Առգրավում կատարելու արձանագրությամբ, որի համաձայն «Հայփոստ» ՓԲԸ-ից առգրավվել է 0002 փոստային բաժանմունքի տեսախցիկների տեսագրությունները:
/դատական նիստի արձանագրություն, հատոր-1 գ.թ. 192/

3.13. «Հայփոստ» ՓԲԸ-ի 0002 փոստային բաժանմունքի տեսախցիկների տեսագրություններով լազերային սկավառակի զննության արձանագրությամբ, որի համաձայն տեսագրությունում երևում է փոստային բաժանմունքի աշխատակիցների նստավայրի հատվածը՝ սրահի կողմից, եվրոարտադրության պատուհանները, որոնցում երևում են հաճախորդների կողմից աշխատակիցներին մոտենալու հատվածը և պատուհանի բաց փեղկը: Նշված տեսագրության 00:06 վայրկյանին, տեղական ժամանակով 15:27:07-ին բաց փեղկով պատուհանին են մոտենում երկու անձ: Նրանցից մեկը արական սեռի ներկայացուցիչ է, երեսին մորուք, սափրված գլխով, իսկ մյուս անձը իգական սեռի ներկայացուցիչ է, երկար սև մազերով և ակնոցներով: Տեսագրության 09 վայրկայնին, տեղական ժամանակով 15:27:09-ին նշված տղամարդը գրպանից հանելով ինչ որ թուղթ՝ այն տալիս է իգական սեռի ներկայացուցչին, ով այն տալիս է փոստային բաժանմունքի աշխատակցին: Տեսագրության 01:02 վայրկյանին, տեղական ժամանակով՝ 15:28:03-ին փոստային բաժանմունքի աշխատակիցը պատուհանի փեղկին մոտեցած իգական սեռի ներկայացուցչին է տալիս ինչ որ թուղթ, ով այն վերցնելով՝ կատարում է գրառումներ: Տեսագրության 03:29 վայրկյանին փոստային բաժանմունքի աշխատակիցը՝ ձեռքին տուփ, մոտենում է իգական սեռի ներկայացուցչին, որից հետո, նախօրոք տրված փաստաթղթում գրառումներ կատարելուց հետո, 04:43 վայրկյանին, տեղական ժամանակով 15:31:44-ին այն տալիս է իգական սեռի ներկայացուցչին, սակայն տուփը վերցնում է արական սեռի ներկայացուցիչը և քայլում է դեպի սրահ, որից հետո նրանք դուրս են գալիս տեսախցիկի տեսադաշտից:
Ըստ մասնակից Մանե Սահակյանի հայտարարության՝ նշված իգական սեռի ներկայացուցիչը ինքն է, իսկ արական սեռի ներկայացուցիչը՝ Կառլեն Շուբարալյանը: Ըստ նույն հայտարարության՝ նշված տուփն այն տուփն է, որն ինքը 2019թ. հուլիսի 8-ին Կառլեն Շուբարալյանի խնդրանքով ստացել է «Հայփոստի» գրասենյակից:
/դատական նիստի արձանագրություն, հատոր-1 գ.թ. 211-213/

3.14. Որպես այլ փաստաթուղթ ապացույց ճանաչված, «Հայփոստ» ՓԲԸ-ի 0002 փոստային բաժանմունքի տեսախցիկների՝ 15:20-ից 15:50-ն ընկած ժամանակահատվածի տեսաձայնագրությունները պարունակող լազերային սկավառակով:
/ դատական նիստի արձանագրություն, հատոր-2 գ.թ. 282, հատոր-1 գ.թ.192Ա/

3.15. Կառլեն Շուբարալյանի կողմից վարվող «ԲՄՎ» մակնիշի 97 RZ 999 հաշվառման համարանիշի ավտոմեքենայի խուզարկության արձանագրությամբ, որի համաձայն նշված ավտոմեքենայի հետևի նստատեղից հայտնաբերվել է պոլիէթիլենային տոպրակի մեջ գտնվող ստվարաթղթե տուփ՝ մանկական խաղալիքներով: Ստվարաթղթե տուփից հանվել է պլաստմասե հարմարանքը, որի մեջ եղել են մանկական խաղալիքներ, իսկ դրա հետևի հատվածից հայտնաբերվել են թվով 148 հատ հաբեր՝ պոլիէթիլենային տոպրակների մեջ, 3 առանձին փաթեթներով, որոնք հանդիսացել են 2019թ. հուլիսի 6-ին «վերահսկելի մատակարարում և գնում» օպերատիվ հետախուզական միջոցառման արդյունքում համապատասխան աշխատակիցների կողմից «ՄԴՄԱ» տեսակի թմրամիջոցների փոխարեն դրված «Վիտրում» տեսակի հաբերը:
/ դատական նիստի արձանագրություն, հատոր-1 գ.թ 221-222/

3.16. Որպես այլ փաստաթուղթ ապացույց ճանաչված, Կառլեն Շուբարալյանի կողմից վարվող «ԲՄՎ» մակնիշի 97 RZ 999 հաշվառման համարանիշի ավտոմեքենայի խուզարկությամբ հայտնաբերված, մանկական խաղալիքներով ստվարաթղթե տուփով:
/ դատական նիստի արձանագրություն, հատոր-2 գ.թ. 283/

3.17. ՀՀ ազգային անվտանգության ծառայության կոռուպցիայի հակազդման և տնտեսական անվտանգության դեպարտամենտից ստացված, Դատարանի որոշումների հիման վրա թույլատրված և գաղտնազերծված, Մանե Սահակյանի և Կառլեն Շուբարալյանի նկատմամբ իրականացված «ներքին դիտում» օպերատիվ հետախուզական միջոցառման արդյունքում ձեռք բերված տվյալներ պարունակող լազերային սկավառակի զննության արձանագրությամբ, որով հաստատվում են վկա Մանե Սահակյանի ցուցմունքները:
/դատական նիստի արձանագրություն, հատոր-2 գ.թ.11-13,/

3.18. Որպես այլ փաստաթուղթ ապացույց ճանաչված, Կառլեն Շուբարալյանի և Մանե Սահակյանի վերաբերյալ իրականացված «ներքին դիտում» օպերատիվ հետախուզական միջոցառումն անցկացնելու արդյունքների մասին լազերային սկավառակով:
/դատական նիստի արձանագրություն, հատոր-2 գ.թ. 281, հատոր-1 գ.թ. 93/

3.19. ՀՀ ազգային անվտանգության ծառայության տնտեսական անվտանգության և կոռուպցիայի հակազդման դեպարտամենտից ստացված, Մանե Սահակյանի 077-20-09-06 հեռախոսահամարի նկատմամբ «հեռախոսային խոսակցությունների վերահսկում» օպերատիվ-հետախուզական միջոցառումների իրականացման արդյունքների պարունակությամբ X-1268-19 լազերային սկավառակի զննության արձանագրությամբ, որով հաստատվում են Մանե Սահակյանի ցուցմունքները:
/դատական նիստի արձանագրություն, հատոր-2 գ.թ. 96-99/

3.20. ՀՀ ազգային անվտանգության ծառայության տնտեսական անվտանգության և կոռուպցիայի հակազդման դեպարտամենտից ստացված, Կառլեն Շուբարալյանի 044-14-20-20 հեռախոսահամարի նկատմամբ «հեռախոսային խոսակցությունների վերահսկում» օպերատիվ-հետախուզական միջոցառումների իրականացման արդյունքների պարունակությամբ X-1267-19 լազերային սկավառակի զննության արձանագրությամբ, որով հաստատվում են Մանե Սահակյանի ցուցմունքներում նշված հանգամանքները:
/դատական նիստի արձանագրություն, հատոր-2 գ.թ. 102-104/

3.21. Որպես այլ փաստաթուղթ ապացույց ճանաչված, X-1267-19 և X-1268-19 համարների լազերային սկավառակներով:
/դատական նիստի արձանագրություն, հատոր-2 գ.թ. 111, հատոր-1 գ.թ. 74/

3.22. «ՄՏՍ Հայաստան» ՓԲ ընկերությունից 30.08.2019թ. ստացված, Մանե Սահակյանի կողմից օգտագործվող 077-20-09-06 բջջային հեռախոսահամարի և «Յուքոմ» ՍՊ ընկերությունից 18.09.2019թ. ստացված, Կառլեն Շուբարալյանի կողմից օգտագործվող 044-14-20-20 բջջային հեռախոսահամարի վերծանումներով լազերային սկավառակների զննության արձանագրությամբ, որով հաստատվում են Մանե Սահակյանի ցուցմունքներում նշված հանգամանքները:

/դատական նիստի արձանագրություն, հատոր-2 գ.թ 107-110/

3.23. Իրեղեն ապացույց ճանաչված, Մանե Սահակյանի անվամբ, վերջինիս պատկանող գեղեցկության սրահի՝ ք.Երևան Մարտիրոս Սարյան 26/4 հասցեով ԱՄՆ-ից ուղարկված CX447285567US համարի միջազգային փոստային առաքանու մեջից հայտնաբերված 148 հատ, 58,9 գրամ ընդհանուր քաշով «ՄԴՄԱ» տեսակի թմրամիջոցներով:
/դատական նիստի արձանագրություն, հատոր-1 գ.թ. 133-134/

3.24. Իրեղեն ապացույց ճանաչված, Մանե Սահակյանի անվամբ, վերջինիս պատկանող գեղեցկության սրահի՝ ք.Երևան Մարտիրոս Սարյան 26/4 հասցեով ԱՄՆ-ից ուղարկված CX447285567US համարի միջազգային փոստային առաքանու մեջից հայտնաբերված 148 հատ, 58,9 գրամ ընդհանուր քաշով «ՄԴՄԱ» տեսակի թմրամիջոցի փոխարեն դրված, 148 հատ «VITRUM» անվանումով վիտամինի հաբերով:
/դատական նիստի արձանագրություն, հատոր-2 գ.թ 135-136/


3.25. Կառլնե Շուբարալյանի և Մանե Սահակյանի վերաբերյալ իրականացված «արտաքին դիտում» օպերատիվ հետախուզական միջոցառման արդյունքների մասին լազերային սկավառակի զննության արձանագրությամբ, որով հաստատվում են Մանե Սահակյանի ցուցմունքներում նշված հանգամանքները:
/դատական նիստի արձանագրություն, հատոր-2 գ.թ. 265/

3.26. Որպես այլ փաստաթուղթ ապացույց ճանաչված, Կառլեն Շուբարալյանի և Մանե Սահակյանի վերաբերյալ իրականացված «արտաքին դիտում» օպերատիվ հետախուզական միջոցառումն անցկացնելու արդյունքների մասին լազերային սկավառակով:
/դատական նիստի արձանագրություն, հատոր 2 գ.թ. 266, հատոր 1 գ.թ. 94/


3.27. ՀՀ ազգային անվտանգության ծառայության ՏՏԳ վարչությունից ստացված, Կառլեն Շուբարալյանի բջջային հեռախոսի տվյալներով լազերային սկավառակի զննության արձանագրությամբ, որի համաձայն՝ Կառլեն Շուբարալյանի կողմից օգտագործվող բջջային հեռախոսի WhatsApp Messenger հավելվածի ANGLE VEGAS գրառմամբ +17023050577 հեռախոսահամարի բաժանորդը դեռևս 18.06.2019թ. ժամը 00:49:28-ին և 00:49:23-ին Կառլեն Շուբարալյանին է ուղարկել «ՄԴՄԱ» տեսակի թմրամիջոցի դեղահաբերի լուսանկարներ և դրանց վերաբերյալ գրառումներ: Դրանից հետո, 25.06.2019թ. նույն հեռախոսահամարի բաժանորդը Կառլեն Շուբարալյանին ուղարկել է այն անդորրագիրը, որով նշված թմրամիջոցով ծանրոցը ուղարկել է ՀՀ:
/դատական նիստի արձանագրություն, հատոր 2 գ.թ. 276-278,/

3.28. Այլ փաստաթուղթ ապացույց ճանաչված, խուզարկությամբ առգրավված, Կառլեն Շուբարալյանին պատկանող, 353061100672315 գործարանային համարի «Այֆոն ԻքսՌ» մոդելի բջջային հեռախոսով:
/դատական նիստի արձանագրություն, հատոր 2 գ.թ. 279,/

3.29. Որպես այլ փաստաթուղթ ապացույց ճանաչված, ՀՀ ազգային անվտանգության ծառայության ՏՏԳ վարչությունից ստացված, Կառլեն Շուբարալյանի բջջային հեռախոսի տվյալներով լազերային սկավառակով:
/դատական նիստի արձանագրություն, հատոր 2 գ.թ. 280, հատոր 2 գ.թ. 238/

3.30. Առաջադրված մեղադրանքում մեղադրյալ Կառլեն Շուբարալյանն իրեն մեղավոր չճանաչեց և պնդեց իր նախաքննական ցուցմունքն այն մասին, որ մանուկ հասակից բնակվել է ԱՄՆ-ում: Այնտեղ ընտանիքով զբաղվել են տարբեր բիզնեսներով: Ունեցել են մի քանի ռեստորան (Almasina, Viceroy), դեղատուն` Pinacle pharmacy, ինչպես նաև եղել են մեքենաների վաճառքի դիլեր (Luxury Ride)։ Իրենց տարածքը գտնվել է Վենտուրա Բուլվարի վրա: Այժմ ունեն տրանսպորտային կազմակերպություն և իրենց ավտոբուսները Լոս Անջելեսից գնում են տարբեր ուղղություններով` Արիզոնա նահանգի քաղաքներ, Նևադա նահանգի քաղաքներ և այլն: Երբ վերադարձել է Հայաստան՝ որոշել է զբաղվել այն գործերով, որոնցից հասկանում է։ Այդ պատճառով վերցրել է «Աստրալ» ակումբը և սկսել է աշխատեցնել: Ցանկացել է զբաղվել նաև ավտոմեքենաների վաճառքով, ինչպես նաև ԱՄՆ-ից Հայաստան ներկրել բոտեքսի համար նախատեսված դեղեր և քսուքներ: Բոտեքսի համար դեղեր ու քսուքներ, ինչպես նաև ավոտմեքենաներ ներմուծելու հարցով պարբերաբար խոսել և քննարկումներ է ունեցել ԱՄՆ-ում բնակվող իր մտերիմ Էնջելի հետ, ով էլ պետք է այնտեղից ուղարկեր դրանք: Նա իրեն ԱՄՆ աճուրդներից ուղարկել է մեքենաների նկարներ, ինքը ընտրել է, թե որոնք պետք է գնեն, նա ուղարկի Հայաստան, իսկ ինքը վաճառի և շահույթը կիսվեն: Քանի որ իր նախկին ընկերուհի Մանե Սահակյանն իրեն խնդրել է, որ ԱՄՆ-ից իր համար սպորտային կոշիկներ /բոթասներ/ պատվիրի՝ դրա համար էլ Էնջելի հետ հերթական խոսակցություններից մեկի ժամանակ խնդրել է, որ փոստով սպորտային կոշիկներ ուղարկի իր և Մանեի համար, ինչպես նաև խնդրել է, որ բոտեքսի ներարկելու համար նախատեսված դեղերի նմուշներ ուղարկի, որպեսզի այստեղ այդ գործով զբաղվող մարդկանց ցույց տա և պարզի՝ կցանկանան դրանցից գնել, թե ոչ: Հայաստանում գտնվելով՝ կապ է հաստատել մի ամերիկյան ընկերության հետ, որոշել է նրանց բոտեքսի դեղերի նմուշները բերել ԱՄՆ-ից, ցույց տալ Երևանի տարբեր գեղեցկության սրահների, բժիշկների, հասկանալ պահանջարկը, որոշել դրանց գները և կրկին զբաղվել դրանց արտադրությամբ ԱՄՆ-ում և դրանց վաճառքի բիզնեսով Հայաստանում: Բոթեքսի դեղերի հետ կապված իր հեռախոսում կան ապացույցներ: Ինքը գիտեր, որ այդ ընկերությունը շատ մեծ է և բոտեքսի դեղեր ԱՄՆ-ից մեծ քանակություններով ուղարկում են իր իմանալով նաև Մոսկվա, Կիև, տարբեր երկրներ, ուստի որոշել է, որ Հայաստանում էլ ինքը կզբաղվի այդ գործով:
08.07.2019թ. ցերեկը Մանեից ստանալով հաղորդագրություն, որ ծանրոց է եկել՝ խոսել է նրա հետ հեռախոսով և պայմանավորվել են միասին գնալ Սարյանի վրայի փոստային բաժանմունք՝ այն ստանալու համար: Ինքը մտածել է, որ իրենց սպորտային կոշիկներն ու բոտեքսի դեղերն են տեղ հասել և զանգահարել է ԱՄՆ իր ծանոթին: Նրան ասել է, որ ծանրոցը հասել է, շնորհակալություն է հայտնել իր խնդրանքը կատարելու` սպորտային կոշիկներն ու բոտոքսի դեղերն ուղարկելու համար: Այդ ժամանակ Էնջելն ասել է, որ քուզենը բուտսը չի ուղարկել, բայց երեխաների զարդերի մեջ լիքը «OK GOODES» սյուրպրիզ է իրեն ուղարկել, որ կխմի՝ կհասկանա: Ինքը հարցրել է, թե ինչ է ասում, բայց նա պատասխանել է, որ ինքը քնած է, ուղեղը չի աշխատում, գնա, պասիլկեն վերցնի, վաղը, երբ իրենց մոտ առավոտ լինի՝ կզանգի կասի ինչ անի: Երբ ասել է, որ բուտս չի ուղարկել՝ չի հասկացել՝ արդյոք բոթասը չի ուղարկել, թե բոտեքսը, քանի որ քնաթաթախ է խոսել: Շատ կոնկրետ չի հասկացել նաև, թե ինչ սյուրպրիզի մասին է խոսում, բայց «OK GOODES» սյուրպրիզից ենթադրել է, որ կայֆի, սեքսի դեղեր են: ԱՄՆ-ում կան կայֆի, սեքսի դեղեր, որ թույլատրելի են և կան, որոնք չեն թույլատրվում: Որոնք թույլատրվում են, դրանց մասին ասում են, որ «OK GOODES» է: Դրանից հետո զանգել է Մանեին ու պայմանավորվել են, թե որտեղ պիտի հանդիպեն՝ փոստային բաժանմունք գնալու համար: Պայմանավորվելուց հետո գնացել է Մանեի աշխատանքի վայրի մոտ, որտեղից միասին գնացել են փոստ: Մանեն մեքենայի մեջ իրեն փոխանցել է ծանրոցի ստացականը, որով էլ փոստից ծանրոցը ստացել է: Փոստային բաժանմունքում Մանեն հարցրել է, թե ինչ է ծանրոցի մեջ։ Ինքը նրան ասել է, որ քիչ առաջ տեղեկացել է, որ երեխաների համար զարդեր են ուղարկել: Դրանից հետո ծանրոցը ստացել են, նստել են Մանեի մեքենան ու շարժվել են: Արկղը բացելուց հետո տեսել է, որ երեխաների թևնոցներ գործելու թելեր և քարեր են: Հասկացել է, որ այդ քարերի մեջ էլ կայֆի դեղերն են, բայց չի իմացել, թե դրանք կոնկրետ որոնք են, քանի որ բոլորը մանր վզնոց, թևնոց գործելու գունավոր, մարմնագույն քարեր և հատիկներ են եղել: Նույնիսկ չի իմացել, թե դրանք ինչպես են օգտագործում, պետք է սպասեր, որ ԱՄՆ-ում լույսը բացվեր և Էնջելից հարցներ, թե դրանցից որոնք են կայֆի դեղերը, ինչ դեղեր են և ինչպես են օգտագործում:
Մանեն իրեն իջեցրել է իր աշխատանքի վայր ու ինքը գնացել է: Դրանից հետո սրճարան է կանչել վարորդին` Սոկրատին, փոստից ստացված տուփից հանել է խաղալիքի տուփը, դրել է տոպրակի մեջ և ասել է, որ երեխաների խաղալիք է՝ տանի տուն, իսկ փոստի տուփը քանի որ էլ պետք չի եղել՝ ասել է, որ թափի աղբամանը: Դրանից քիչ անց իր սրճարանից իրեն ՀՀ ԱԱԾ աշխատակիցները բերման են ենթարկել: Այդպես էլ չի հասցրել զանգահարել ծանոթին և իմանալ, թե կոնկրետ որոնք են այդ կայֆի, սեքսի դեղերը և կոնկրետ ինչ դեղեր են:
/ դատական նիստի արձանագրություն, 1-ին հատոր գ.թ. 166-167, 202-203, 229-230,
2-րդ հատոր գ.թ. 27-28, 161-163, 268-275/:


4. Դատարանի իրավական վերլուծությունները.
4.1. Ստուգելով ամբաստանյալի ցուցմունքները, համադրելով դրանք քրեական գործով ձեռք բերված և հետազոտված մյուս ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ` Դատարանը գտնում է, որ ամբաստանյալին առաջադրված մեղադրանքը հիմնավորող ցուցմունքներն արժանահավատ են, հաստատվում են քրեական գործի քննությամբ ձեռք բերված և հետազոտված ապացույցների համակցությամբ, իսկ ամբաստանյալի ցուցմունքներն այն մասին, որ ինքն առանձնապես խոշոր չափերով թմրամիջոցների մաքսանենգություն կազմակերպելու, ինչպես նաև առանձնապես խոշոր չափերով թմրամիջոցների իրացման փորձի հետ կապ չունի՝ իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում է վերոհիշյալ ապացույցներով:
4.2. Վերլուծելով պաշտպանի պատճառաբանությունները, այդ թվում նաև այն մասին, որ՝
-վերաբերելի, թույլատրելի և հավաստի ապացույցների բավարար համակցություն ձեռք չի բերվել՝ առաջադրված մեղադրանքները հիմնավորված գնահատելու համար,
-Մեխիաս Հեկտոր Ալեքսիսի հայտնածն այն մասին, որ Կառլեն Շուբարալյանն առնչություն չի ունեցել Հայաստան ուղարկված թմրամիջոցների հետ՝ Դատարանը պատշաճ կարգով չի գնահատել,
- Կառլեն Շուբարալյանից առգրավված բջջային հեռախոսն ունեցել է այլ անվանում և նույնացման համար,
- Մանե Սահակյանի ցուցմունքները կոնֆրոնտացիայի իրավունքով չապահովված ապացույցներ են, ինչի պատճառով դրանց օգտագործումն անթույլատրելի է,
-օպերատիվ հետախուզական միջոցառումներն իրականացվել են թակարդման եղանակով, իսկ դրանց դատական ստուգման և հիմնավորող փաստաթղթեր պահանջելու մասին իր միջնորդությունն անհիմն մերժվել է,
-թմրամիջոցների իրացման փորձի մեղադրանքին վերաբերվող ապացույցներ առկա չեն՝ Դատարանը գտնում է, որ դրանք ամբողջովին անհիմն են, իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու հարցում Կառլեն Շուբարալյանին օգնելու նպատակ են հետապնդում և հերքվում են քրեական գործով ձեռք բերված ապացույցների բավարար համակցությամբ։
Մասնավորապես՝ որպես պաշտպանության կողմի վկա՝ օտարերկրացի Մեխիաս Հեկտոր Ալեքսիս ներկայացված անձը պատշաճ կարգով ծանուցվել է Դատարան ներկայանալու անհրաժեշտության, հերթական դատական նիստի օրվա, ժամի և վայրի մասին, սակայն Դատարան չի ներկայացել, երբևէ հարցաքննված չի եղել։
Կառլեն Շուբարալյանից առգրավված հեռախոսը պատշաճ կարգով արձանագրվել և զննվել է, սակայն տարբեր փաստաթղթերում նշվել է հեռախոսի նույնականացման երկու համարներից մեկը, իսկ անվան մեջ մեկ տառ ավել է նշվել։ Այնուամենայնիվ հեռախոսը նույնականացվել է նաև դրանում առկա, Կառլեն Շուբարալյանի լուսանկարով և այլ հատկանիշներով։
Մանե Սահակյանի ցուցմունքը կոնֆրոնտացիայի իրավունքով ապահովված ապացույց է, քանի որ նա իր ցուցմունքը պնդել է Կառլեն Շուբարալյանին առերես, վերջինիս պաշտպանների ներկայությամբ։
Օպերատիվ հետախուզական միջոցառումները թակարդման եղանակով իրականացված լինելու հանգամանքը հաստատող բավարար հիմնավորումներ Դատարանին չեն ներկայացվել, իսկ դրանց դատական ստուգման և հիմնավորող փաստաթղթեր պահանջելու մասին միջնորդությունը մերժվել է՝ պատշաճ կարգով փաստարկված և հիմնավորված չլինելու պատճառով:
Դատարանը գտնում է, որ ամբաստանյալ Կառլեն Շուբարալյանի կողմից, նրա մեղավորությամբ, առանձնապես խոշոր չափերով, Հայաստանի Հանրապետության պետական սահմանով թմրամիջոցների մաքսանենգություն կազմակերպելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով նախատեսված հանցագործության հատկանիշներին:
Ապացուցված է նաև ամբաստանյալ Կառլեն Շուբարալյանի կողմից, նրա մեղավորությամբ, իրացման նպատակով առանձնապես խոշոր չափերով թմրամիջոցներ ձեռք բերելու փորձը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով նախատեսված հանցագործության հատկանիշներին:
4.3. Հանցագործություններից յուրաքանչյուրի համար ամբաստանյալի նկատմամբ պատիժ նշանակելու հարցը քննելիս` Դատարանը գտնում է հետևյալը.
ՀՀ քրեական օրենսգրքի 10-րդ հոդվածի համաձայն`
«Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար»։
Նույն օրենսգրքի 34-րդ հոդվածի համաձայն՝
«Հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով:»:
Նույն օրենսգրքի 38-րդ հոդվածի համաձայն
« 1. Կատարողի հետ մեկտեղ հանցակիցներ են համարվում կազմակերպիչը, դրդիչը և օժանդակողը:
. (…)
3. Կազմակերպիչ է համարվում այն անձը, ով կազմակերպել կամ ղեկավարել է հանցանքի կատարումը, ինչպես նաև ստեղծել է կազմակերպված խումբ կամ հանցավոր համագործակցություն կամ ղեկավարել է դրանք: (…)»:
Նույն օրենսգրքի 48-րդ հոդվածի 2-րդ մասի համաձայն՝
«Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»։
Նույն օրենսգրքի 55-րդ հոդվածի համաձայն՝
«1. Գույքի բռնագրավումը դատապարտյալի սեփականությունը համարվող գույքը կամ դրա մի մասը հարկադրաբար և անհատույց վերցնելն է` ի սեփականություն պետության:
2. Գույքի բռնագրավման չափը դատարանը որոշում է` նկատի ունենալով հանցագործությամբ հասցված գույքային վնասի, ինչպես նաև հանցավոր ճանապարհով ձեռք բերված գույքի չափը: Գույքի բռնագրավման չափը չի կարող գերազանցել հանցագործությամբ հասցված վնասի կամ հանցավոր ճանապարհով ձեռք բերված օգուտի չափը:
3. Գույքի բռնագրավումը կարող է նշանակվել շահադիտական դրդումներով կատարված ծանր և առանձնապես ծանր հանցանքների համար սույն օրենսգրքի Հատուկ մասով նախատեսված դեպքերում:
6. Բռնագրավման ենթակա չէ դատապարտյալի կամ նրա խնամքի տակ գտնվող անձանց համար անհրաժեշտ գույքն այն ցանկին համապատասխան, որը սահմանված է օրենքով: »։
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները։
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով։ (…)»։
Նույն օրենսգրքի 66-րդ հոդվածի 4-րդ մասի համաձայն.
«(…)4. Եթե հանցանքների համակցությունն ընդգրկում է ծանր կամ առանձնապես ծանր հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Ընդ որում, ազատազրկման ձևով վերջնական պատիժը չի կարող գերազանցել քսանհինգ տարին: Եթե համակցության մեջ մտնող հանցանքներից մեկի համար դատարանը նշանակում է ցմահ ազատազրկում, ապա վերջնական հիմնական պատիժը որոշվում է կլանելու միջոցով:: (…)»
Նույն օրենսգրքի 69-րդ հոդվածի 3-րդ մասի համաձայն.
«(…)3. Մինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին՝ մեկ օրը հաշվելով մեկ օրվա դիմաց, իսկ հանրային աշխատանքների դեպքում՝ մեկ օրը երեք ժամի դիմաց: (…)»
ՀՀ վճռաբեկ դատարանը Կարեն Տիգրանի Հարությունյանի վերաբերյալ ՎԲ-201/07 քրեական գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները` 2007 թվականի նոյեմբերի 30-ին կայացված որոշմամբ արտահայտել է հետևյալ իրավական դիրքորոշումները.
«4. (…) ՀՀ քրեական օրենսգրքի 48-րդ հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները։ Սոցիալական արդարությունը վերականգնելու նպատակը բխում է արդարության և պատասխանատվության անհատականացման սկզբունքն ամրագրած ՀՀ քրեական օրենսգրքի 10-րդ հոդվածի բովանդակությունից։ Այն սահմանում է, որ հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար։ Սոցիալական արդարության վերականգնումը հնարավոր է, եթե հանցանք կատարած անձի նկատմամբ նշանակվի այնպիսի պատիժ, որն անհրաժեշտ ու բավարար է նրան ուղղելու և նոր հանցագործությունները կանխելու համար։
Պատիժ նշանակելու արդարության սկզբունքը դրսևորվում է օրենքով նախատեսված մի շարք պահանջներով։ ՀՀ քրեական օրենսգրքի 61-րդ հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ։ Նույն հոդվածի 3-րդ մասի համաձայն` պատժի տեսակը և չափը որոշվում է հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով։ Պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար։ (…)»։
ՀՀ վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշման մեջ արտահայտել է նաև հետևյալ իրավական դիրքորոշումը.
«(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…)։
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա։ (…)
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով։ Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս։ Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:(…)»։
Նույն որոշման մեջ ՀՀ վճռաբեկ դատարանն արտահայտել է նաև հետևյալ իրավական դիրքորոշումը.
«(…) ՀՀ քրեական օրենսգրքի 268-րդ հոդվածի 1-ին մասը պատասխանատվություն է նախատեսում, ի թիվս այլնի, առանց իրացնելու նպատակի զգալի չափերով թմրամիջոցներ ապօրինի ձեռք բերելու կամ պահելու համար:
Նշված նորմի վերլուծության հիման վրա Վճռաբեկ դատարանն արձանագրում է, որ տվյալ հանցագործության վերաբերյալ գործերով պատժի անհատականացման սկզբունքի տեսանկյունից արարքի հանրային վտանգավորությունը որոշելիս դատարանը, ի թիվս այլնի, պետք է հաշվի առնի.
- թմրանյութի տեսակը (վտանգավորության աստիճանը, անձի օրգանիզմի վրա ազդեցության աստիճանը),
- դրա չափը (ՙԹմրամիջոցների և հոգեմետ (հոգեներգործուն) նյութերի զգալի, խոշոր և առանձնապես խոշոր չափերը սահմանող` ՀՀ քրեական օրենսգրքի թիվ 1 հավելվածում նշված կոնկրետ չափի նվազագույն կամ առավելագույն սահմանին մոտ լինելը),
- արարքի կատարման նպատակն ու շարժառիթը (օրինակ՝ հիվանդությամբ պայմանավորված ցավերը թեթևացնելու համար կատարելը):»։
Պատիժ նշանակելը քրեական գործով արդարադատության իրականացման վճռական պահն է, որը պետք է դառնա կատարված հանցագործության հասարակական վտանգավորության գնահատման լիարժեք չափանիշ, պատժի ենթարկվող անձին ուղղելու ամենակարճ ճանապարհ, ինչպես ամբաստանյալի, այնպես էլ այլ անձանց կողմից նոր հանցագործությունները կանխելու գործուն միջոց: Պատասխանատվության և պատժի անհատականացման սկզբունքը պատժի տեսակը և չափը որոշելու բազմաթիվ դրույթների ու չափանիշների հետ մեկտեղ անխզելիորեն կապված է պատասխանատվությունը և պատիժը մեղմացնող ու ծանրացնող հանգամանքները հետազոտելու և հաշվի առնելու հետ: ՀՀ քրեական դատավարության օրենսգրքի 107-րդ հոդվածում թվարկված են յուրաքանչյուր քրեական գործով ապացուցման ենթակա փաստական հանգամանքները: Այդ հոդվածի 5-րդ կետի համաձայն՝ քրեական օրենքով նախատեսված պատասխանատվությունը մեղմացնող կամ խստացնող հանգամանքները հաստատվում են միայն ապացույցների հիման վրա: Ընդ որում, անձի պատասխանատվությունը և պատիժը մեղմացնող ու ծանրացնող հանգամանքների գնահատումը յուրաքանչյուր կոնկրետ գործով պատիժ նշանակելիս հնարավորություն է տալիս դատարանին պատկերացում կազմել հանցագործության՝ հանրության համար վտանգավորության աստիճանի, բնույթի, ինչպես նաև հանցավորի անձնավորության մասին և յուրաքանչյուր կոնկրետ գործով անհատականացնել պատիժը: Պատժի անհատականացման կարևորությունն այն է, որ դա լուրջ երաշխիք է ՀՀ քրեական օրենսգրքի 48-րդ հոդվածի 2-րդ մասով սահմանված` պատժի նպատակների իրականացման համար:
Մեջբերված իրավական նորմերը Վճռաբեկ դատարանը վերլուծել և դրանց վերաբերյալ իրավական դիրքորոշումներ է հայտնել թիվ ՎԲ-142/07, ՎԲ-192/07, ՎԲ-50/07, ՎԲ-201/07, ԵՇԴ/0029/01/08, ԵԿԴ/0042/01/11, ինչպես նաև մի շարք այլ գործերով կայացված որոշումներում: Նշված որոշումներում Վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
4.4. Վերոհիշյալ իրավական դիրքորոշումների համատեքստում ամբաստանյալ Կառլեն Շուբարալյանին վերագրվող հանցավոր արարքների հանրային վտանգավորությունը գնահատելիս, ի թիվ այլնի Դատարանը հաշվի է առնում.
գ թմրանյութի տեսակը, այն որ ամբաստանյալ Կառլեն Շուբարալյանը կազմակերպել է առանձնապես խոշոր չափերով «ՄԴՄԱ» տեսակի թմրամիջոցի մաքսանենգություն, ինչպես նաև՝ 2019թ. հուլիսին, Երևանում, փորձել է իրացման նպատակով ապօրինի ձեռք բերել առանձնապես խոշոր չափերով «ՄԴՄԱ» տեսակի թմրամիջոց,
գ թմրամիջոցի չափը – «Թմրամիջոցների և հոգեմետ հոգեներգործուն նյութերի մանր, զգալի, խոշոր կամ առանձնապես խոշոր չափերը, շրջանառությունն արգելված՝ թմրամիջոցներ, հոգեմետ /հոգեներգործուն/, խիստ ներգործող կամ թունավոր նյութեր պարունակող բույսերի ցանկը, դրանց մանր, զգալի, խոշոր և առանձնապես խոշոր չափերը, թմրամիջոցների և հոգեմետ /հոգեներգործուն/ նյութերի պրեկուրսորների խոշոր կամ առանձնապես խոշոր չափերը, թունավոր նյութերի ցանկը, խիստ ներգործող նյութերի ցանկը և դրանց խոշոր չափերը սահմանելու մասին» ՀՀ կառավարության 2018թ. հունիսի 27-ի թիվ 707-Ն որոշման թիվ մեկ հավելվածի համաձայն՝ «ՄԴՄԱ» տեսակի թմրամիջոց առանձնապես խոշոր չափի նվազագույն շեմը կազմում է 1,25 գրամ, իսկ ամբաստանյալ Կառլեն Շուբարալյանի կողմից կատարված հանցագործություններից երկուսի դեպքում էլ «ՄԴՄԱ» տեսակի թմրամիջոցի չափն ավելի քան 47 անգամ գերազանցում է թմրամիջոցի տվյալ տեսակի առանձապես խոշոր չափի նվազագույն շեմը:
4.5. Գնահատելով ամբաստանյալի անձը բնութագրող, պատասխանատվությունը և պատիժը մեղմացնող և ծանրացնող հանգամանքները՝ Դատարանն ամբաստանյալ Կառլեն Շուբարալյանի նկատմամբ պատիժ նշանակելիս՝ նրա պատասխանատվությունը և պատիժը ծանրացնող կամ մեղմացնող հանգամանքներ չի արձանագրում:
4.6. Հաշվի առնելով վերոգրյալը` Դատարանը գտնում է, որ ամբաստանյալ Կառլեն Շուբարալյանն իր կատարած հանցագործություններից յուրաքանչյուրի համար ենթակա է պատժի ազատազրկման ձևով: Ելնելով պատժի նպատակների կենսագործման կարևորությունից՝ Դատարանը գտնում է, որ ամբաստանյալ Կառլեն Շուբարալյանի նկատմամբ, իր կատարած՝ ՀՀ քրեական օրենսգրքի 34-267.1-րդ հոդվածի 4-րդ մասի 1-ին կետով նախատեսված հանցանքի համար նշանակվող հիմնական պատժի հետ միասին պետք է նշանակվի այդ հանցանքի համար որպես լրացուցիչ պատիժ նախատեսված՝ գույքի բռնագրավումը:
Գույքի բռնագրավման չափը որոշելիս՝ Դատարանը հաշվի է առնում «ՄԴՄԱ» տեսակի թմրամիջոցի իրացման ենթադրյալ արժեքն այդ ժամանակահատվածում, ուստի գտնում է, որ ամբաստանյալ Կառլեն Շուբարալյանից բռնագրավվող գույքի չափը չի կարող գերազանցել 1.500.000 / մեկ միլիոն հինգ հարյուր հազար/ ՀՀ դրամ գումարը:
4.7. Քննարկելով նշանակված պատիժը ամբաստանյալի կողմից կրելու հարցը, վերոհիշյալ իրավական դիրքորոշումների համատեքստում գնահատելով ամբաստանյալի կատարած հանցանագործություններից յուրաքանչյուրի բնույթը և հանրային վտանգավորության աստիճանը, ամբաստանյալի անձը բնութագրող տվյալների, պատասխանատվությունը և պատիժը մեղմացնող և ծանրացնող հանգամանքների վերաբերյալ վերը նշված վերլուծությունները՝ Դատարանը գտնում է, որ ամբաստանյալ Կառլեն Շուբարալյանը պետք է կրի իր նկատմամբ ազատազրկման ձևով նշանակված պատիժը, քանի որ այդ պատիժը կրելուց նրան ազատելու հիմքերի առկայության վերաբերյալ տեղեկություններ Դատարանին չեն ներկայացվել:
4.8. Քննարկելով իրեղեն ապացույցների հարցը՝ Դատարանը գտնում է, որ իրեղեն ապացույց ճանաչված թմրամիջոցները պետք է վերադարձնել ՀՀ ԱԱԾ քննչական դեպարտամենտին՝ թիվ 58217119 քրեական գործով տնօրինելու համար, «վերահսկելի մատակարարում և գնում» օպերատիվ-հետախուզական միջոցառման ընթացքում օգտագործված «Վիտրում» /VITRUM/ անվանումով վիտամինի հաբերը՝ ՀՀ ԱԱԾ տնտեսական անվտանգության և կոռուպցիայի հակազդման դեպարտամենտին, որպես այլ փաստաթուղթ՝ ապացույց ճանաչված, Կառլեն Շուբարալյանին պատկանող «Այֆոն իքս» մոդելի բջջային հեռախոսը՝ պահել քրեական գործի հետ միասին, ամբաստանյալ Կառլեն Շուբարալյանին պատկանող վարորդական իրավունքի վկայականը, 409.000 /չորս հարյուր ինը հազար/ ՀՀ դրամ գումարը, մանկական խաղալիքը՝ վերադարձնել նրան:
4.9. Քննելով խափանման միջոցի հարցը` Դատարանը գտնում է, որ ամբաստանյալ Կառլեն Շուբարալյանի նկատմամբ ընտրված խափանման միջոց կալանավորումը հիմնավոր է և վերացվելու կամ փոփոխվելու ենթակա չէ՝ մինչև դատավճռի օրինական ուժի մեջ մտնելը, քանի որ երկարաժամկետ ազատազրկման դատապարտվելու պարագայում պատժի կրումից խուսափելու հավանականությունը բարձրանում է:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-365-րդ և 369-373-րդ հոդվածներով` Դատարանը

Վ Ճ Ռ Ե Ց

1. Ամբաստանյալ Կառլեն Դանիելի Շուբարալյանին մեղավոր ճանաչել ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով և 34-266-րդ հոդվածի 3-րդ մասի 2-րդ կետով նախատեսված հանցանքներում և դատապարտել.
ՀՀ քրեական օրենսգրքի 38-267.1-րդ հոդվածի 4-րդ մասի 1-ին կետով` ազատազրկման` 8 /ութ/ տարի ժամկետով՝ գույքի կեսի բռնագրավմամբ, սակայն ոչ ավելի 1.500.000 /մեկ միլիոն հինգ հարյուր հազար/ ՀՀ դրամից,
ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով` ազատազրկման` 7 /յոթ/ տարի ժամկետով՝ առանց գույքի բռնագրավման:
ՀՀ քրեական օրենսգրքի 66-րդ հոդվածի 4-րդ մասով սահմանված` պատիժների մասնակի գումարման սկզբունքի կիրառմամբ` ամբաստանյալ Կառլեն Դանիելի Շուբարալյանի նկատմամբ պատիժ նշանակել ազատազրկում՝ 9 /ինը/ տարի ժամկետով, գույքի կեսի բռնագրավմամբ, սակայն ոչ ավելի 1.500.000 / մեկ միլիոն հինգ հարյուր հազար/ ՀՀ դրամից:
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում՝ պատժի սկիզբը հաշվելով 2019թ. հուլիսի 8-ից։
2. Իրեղեն ապացույց ճանաչված թմրամիջոցները վերադարձնել ՀՀ ԱԱԾ քննչական դեպարտամենտին՝ թիվ 58217119 քրեական գործով տնօրինելու համար:
«Վերահսկելի մատակարարում և գնում» օպերատիվ-հետախուզական միջոցառման ընթացքում օգտագործված «Վիտրում» /VITRUM/ անվանումով վիտամին դեղահաբերը վերադարձնել ՀՀ ԱԱԾ տնտեսական անվտանգության և կոռուպցիայի հակազդման դեպարտամենտին:
Որպես այլ փաստաթուղթ՝ ապացույց ճանաչված, Կառլեն Շուբարալյանին պատկանող «Այֆոն իքս» մոդելի բջջային հեռախոսը պահել քրեական գործի հետ միասին:
Ամբաստանյալ Կառլեն Շուբարալյանին պատկանող վարորդական իրավունքի վկայականը, 409.000 /չորս հարյուր ինը հազար/ ՀՀ դրամ գումարը, մանկական խաղալիքը վերադարձնել նրան:
3. Ամբաստանյալ Կառլեն Շուբարալյանի նկատմամբ ընտրված խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
4. Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։


ԴԱՏԱՎՈՐ` Մ. ՄԱՐՏԻՐՈՍՅԱՆ