Գործ թիվ ԵԴ/24323/02/19





ՀԱՅԱՍՏԱՆԻ ՀԱՆՐԱՊԵՏՈԻԹՅԱՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ
ԻՐԱՎԱՍՈՒԹՅԱՆ ԴԱՏԱՐԱՆ

Ո Ր Ո Շ Ո Ւ Մ

ՀԱՅՑԱԴԻՄՈՒՄԸ ՎԵՐԱԴԱՐՁՆԵԼՈՒ ՄԱՍԻՆ

09 օգոստոսի 2019թ. ք. Երևան

ՀՀ Երևան քաղաքի առաջին ատյանի ընդհանուր իրավասության դատարանի դատավոր Տ. Գրիգորյանս (այսուհետ նաև՝ Դատարան)՝ քննարկելով, Ռաֆիկ Վիրաբյանի և <<Ռիվալ>> ՍՊԸ-ի՝ ի դեմս տնօրեն Արամ Մեսրոբի Ղազարյանի (այսուհետ նաև՝ Հայցվորներ) ընդդեմ <<Արմօյլ>> ՓԲԸ-ի, երրորդ անձինք՝ Հայաստանի Հանրապետության՝ հանձինս ՀՀ շրջակա միջավայրի նախարարության, ՀՀ արտակարգ իրավիճակների նախարարության, ՀՀ բնապահպանության և ընդերքի տեսչական մարմնի, ՀՀ քաղաքաշինության կոմիտեի, ՀՀ քաղաքաշինության տեխնիկական և հրդեհային անվտանգության տեսչական մարմնի և Եղվարդ համայնքի ղեկավարի՝ վնաս պատճառող գործունեությունն արգելելու պահանջի մասին քաղաքացիական գործով հայցադիմումը վարույթ ընդունելու հարցը,
Պ Ա Ր Զ Ե Ց Ի

Հայցվորները հայցադիմում են ներկայացրել Դատարան ընդդեմ <<Արմօյլ>> ՓԲԸ-ի, երրորդ անձինք՝ Հայաստանի Հանրապետության՝ հանձինս ՀՀ շրջակա միջավայրի նախարարության, ՀՀ արտակարգ իրավիճակների նախարարության, ՀՀ բնապահպանության և ընդերքի տեսչական մարմնի, ՀՀ քաղաքաշինության կոմիտեի, ՀՀ քաղաքաշինության տեխնիկական և հրդեհային անվտանգության տեսչական մարմնի և Եղվարդ համայնքի ղեկավարի՝ վնաս պատճառող գործունեությունն արգելելու պահանջի մասին:
Հայցադիմումը ՀՀ Երևան քաղաքի առաջին ատյանի ընդհանուր իրավասության դատարանում մուտքագրվել է 31.07.2019թ.:
Քաղաքացիական գործը դատական կազմին հանձնվել է 01.08.2019թ.:
Ուսումնասիրելով ներկայացված հայցադիմումը, կից փաստաթղթերը, Դատարանը գալիս է հետևյալ եզրահանգմանը.
ՀՀ քաղաքացիական դատավարության օրենսգրքի 121-րդ հոդվածի 2-րդ մասի 1-ին կետի համաձայն՝ հայցադիմումում պարտադիր նշվում են`դատարանի անվանումը, որին ներկայացվում է հայցադիմումը:
<<ՀՀ դատական օրենսգիրք սահմանադրական օրենքի>> 23-րդ հոդվածի 1-ին մասի 1-ին կետի համաձայն՝ Հայաստանի Հանրապետությունում գործում են Երևան քաղաքի առաջին ատյանի ընդհանուր իրավասության դատարանը (...):
Արդյունքում, Դատարանը գտնում է, որ Դատարանի անունը Հայցվորների կողմից սխալ է նշվել:
ՀՀ քաղաքացիական դատավարության օրենսգրքի 121-րդ հոդվածի 2-րդ մասի 2-րդ կետի համաձայն՝ հայցադիմումում պարտադիր նշվում են` հայցվորի անունը (անվանումը), հաշվառման (գտնվելու) վայրի հասցեն, ծանուցման հասցեն (եթե այն տարբերվում է հաշվառման (գտնվելու) վայրի հասցեից), այդ թվում` հայցվոր քաղաքացու անձը հաստատող փաստաթղթի տվյալները (այսուհետ՝ անձնագրային տվյալներ), հայցվոր իրավաբանական անձի պետական գրանցման համարը, նրա ներկայացուցչի անունը, անձնագրային տվյալները, ծանուցման հասցեն, իսկ եթե հայցը ներկայացրել է դրա իրավունքն ունեցող պաշտոնատար անձը՝ նաև այդ անձի անունը, պաշտոնը:
Տվյալ դեպքում, Հայցվորներից Ռաֆիկ Վիրաբյանի վերաբերյալ բացակայում է հայրանվան մասին նշումը, մինչդեռ վերը նշված իրավանորմերից հետևում է, որ այն ևս պետք է նշվեր:
ՀՀ քաղաքացիական դատավարության օրենսգրքի 121-րդ հոդվածի 2-րդ մասի 8-րդ կետի համաձայն՝ հայցադիմումում պարտադիր նշվում են` հայցադիմումին կից ներկայացվող փաստաթղթերի և ապացույցների ցանկը:
ՀՀ քաղաքացիական դատավարության օրենսգրքի 122-րդ հոդվածի 1-ին մասի 6-րդ կետի համաձայն՝ հայցադիմումին կցվում են` հայցադիմումի օրինակը և դրան կից փաստաթղթերի պատճենները՝ գործին մասնակցող անձանց թվին համապատասխան, սույն հոդվածի 2-րդ մասով նախատեսված դեպքերում:
Նշվածի վերաբերյալ, Դատարանը ցանկանում է նշել, որ հայցադիմումին կից ներկայացված՝ <<Գործարանի արտադրական գործունեությունը փաստող տեսաերիզներ, թվով 2 հատ, որոնց վրա ձայնագրված են արտադրական ընթացքի երկու դեպքեր>> վերնագրված տեսաերիզները՝ կից ներկայացված օրինակներից մեկում ներկայացվել են 1 օրինակով, մինչդեռ դրանք ևս պետք է ներկայացվերին գործին մասնակցող անձանց թվին համապատասխան՝ 2 օրինակով:
Բացի այդ, հայցադիմումին կից ներկայացված փաստաթղթերի վերաբերյալ հայցադիմումում առկա է նշում, որ կից ներկայացվում են պետական տուրքի վճարման անդորրագրերը, մինչդեռ, փաստացի ներկայացվել է միայն 1 անդորրագիր: Նշված վերաբերյալ Դատարանը ցանկանում է նշել, որ պետական տուրքի վճարումը հավաստող անդորրագիրը ևս հայցադիմումին կից ներկայացվող փաստաթուղթ է, հետևաբար, այն ևս պետք է ներկայացվեր գործին մասնակցող անձանց թվին համապատասխան:
Բացի այդ, հայցադիմումում նշված կից ներկայացվող փաստաթղթերի ցանկում նշված որոշ փաստաթղթեր առհասարակ ներկայացված չեն, ինչի վերաբերյալ Դատարանի գրասենյակի կողմից կազմվել է նաև համապատասխան ակտ: Մասնավորապես, դրանք վերաբերում են հետևյալ փաստաթղթերի՝ <<Հայցվոր ընկերության և <<Սեմուր ընդ կո>> ընկերության միջև>> վերնագրված փաստաթղթին և <<ՀՀ գյուղատնտեսության նախարարի տեղակալի 30.04.2019թ. գրության պատճենը>> վերնագրված փաստաթղթին:
Այսինքն, առկա է նաև անհամապատասխանություն՝ հայցադիմումին կից նշված փաստաթղթերի և ապացույցների ցանկի և փաստացի ներկայացված փաստաթղթերի և ապացույցների միջև:
ՀՀ քաղաքացիական դատավարության 127-րդ հոդվածի 1-ին մասի 3-րդ կետի համաձայն՝ առաջին ատյանի դատարանը վերադարձնում է հայցադիմումը, եթե՝ չեն պահպանվել սույն օրենսգրքով հայցադիմումի ձևին, բովանդակությանը և կից փաստաթղթերին ներկայացվող պահանջները:
Արդյունքում, վերը նշվածի լույսի արդյունքում, Դատարանը գտնում է, որ հայցադիմումը և կից ներկայացված փաստաթղթերը պետք է վերադարձվեն:
Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 122-րդ, 127-րդ, 199-րդ, 361-րդ հոդվածի 1-ին մասի 2-րդ կետով, 362-րդ հոդվածի 4-րդ մասով՝
Ո Ր Ո Շ Ե Ց Ի

Վերադարձնել Ռաֆիկ Վիրաբյանի և <<Ռիվալ>> ՍՊԸ-ի՝ ի դեմս տնօրեն Արամ Մեսրոբի Ղազարյանի ընդդեմ <<Արմօյլ>> ՓԲԸ-ի, երրորդ անձինք՝ Հայաստանի Հանրապետության՝ հանձինս ՀՀ շրջակա միջավայրի նախարարության, ՀՀ արտակարգ իրավիճակների նախարարության, ՀՀ բնապահպանության և ընդերքի տեսչական մարմնի, ՀՀ քաղաքաշինության կոմիտեի, ՀՀ քաղաքաշինության տեխնիկական և հրդեհային անվտանգության տեսչական մարմնի և Եղվարդ համայնքի ղեկավարի՝ վնաս պատճառող գործունեությունն արգելելու պահանջի մասին մասին, հայցադիմումը և կից փաստաթղթերը:
Հայցադիմումում թույլ տրված խախտումները վերացնելու և եռօրյա ժամկետում Դատարան կրկին ներկայացնելու դեպքում՝ հայցադիմումը Դատարանում ընդունված կհամարվի սկզբնական ներկայացման օրը:
Սույն որոշումը օրինական ուժի մեջ է մտնում կայացման պահից և կարող է բողոքարկվել ՀՀ վերաքննիչ քաղաքացիական դատարան` այն ստանալուց հետո յոթնօրյա ժամկետում:




ԴԱՏԱՎՈՐ` Տ. ԳՐԻԳՈՐՅԱՆ